Áherslur í námi og kennslu

Nemendur eru hvattir til sjálfstæðra vinnubragða, samvinnu, að sýna frumkvæði og beita gagnrýnni hugsun. Í skólanum er kennt með fjölbreyttum hætti, stuðst við samvinnu og stefnt er að nýtingu nýjustu tækni á hverjum tíma í kennslunni, svo sem Google Classroom og spegluð kennsla.

Engidalsskóli leggur áherslu á að nemendur geri sér grein fyrir gildi umhverfismenntar og móti sér lífsstíl í anda hennar. Nýttar eru ýmsar aðferðir til þekkingaröflunar, má þar nefna útikennslu, umhverfisfræðslu og upplýsinga- og tæknimennt. Nemendur kynnast sínu nánasta umhverfi, læra að bera virðingu fyrir náttúrunni og þroska með sér alþjóðavitund um umhverfismál.

Í Engidalsskóla er metnaður lagður í list- og verkgreinar sem eru kenndar í smiðjum. Að auki fá nemendur kennslu í tónmennt og syngja vikulega saman í samsöng. Nemendur læra framsögn og taka þátt í Litlu og stóru upplestrarkeppninni. Þeir koma reglulega fram á sal skólans með skemmtanir þar sem foreldrum og öðrum skólafélögum er boðið.

Menntastefna skólans

• Nemendur verði víðsýnir, sýni frumkvæði og geti beitt gagnrýnni hugsun.
• Nemendur læri að beita rökhugsun.
• Nemendur öðlist færi í læsi og námsvitund.
• Nemendur verði meðvitaðri um sjálfan sig, markmið sín og styrki sjálfsmynd sína.
• Nemendur kynnist sköpun, tónlist og leiklist.
• Nemendur verði meðvitaðir um umhverfisvitund og tengsl við náttúruna og nánasta umhverfi og öðlist skilning á sjálfbærri þróun.

Meginmarkmið skólastarfs

• Að nemendur öðlist færni í læsi og námsvitund (Lestur er lífsins leikur).
• Að nemendur verði meðvitaðir um umhverfisvitund og tengsl við náttúruna og sitt nánasta umhverfi (Grænfánaverkefni).
• Að nemendur kynnist skapandi skólastarfi (sífellt er leitað nýrra leiða í námi, samvera á sal og skapandi smiðjur).